நடிகர் சிவகார்த்திகேயன் நடிப்பில் கடந்த பொங்கல் பண்டிகை அன்று வெளியான அயலான் திரைப்படம் ரசிகர்கள் மத்தியில் நல்ல வரவேற்பைப் பெற்றது. விஎஃப்எக்ஸ் காட்சிகளுக்குப் பெரும் பாராட்டுகள் கிடைத்தன.
இந்த நிலையில், அயலான் 2 படம் பற்றிய புதிய அப்டேட் வெளியாகியுள்ளது. அதன்படி, அயலான் 1 திரைப்படத்திற்கு விஎஃப்எக்ஸ் செய்த பேன்தம் எஃப்எக்ஸ் குழுவே அயலான் 2 படத்திற்கும் விஎஃப்எக்ஸ் பணிகளை மேற்கொள்ளும் என அறிவிக்கப்பட்டுள்ளது.
பேன்தம் எஃப்எக்ஸ் நிறுவனம் வெளியிட்டுள்ள அறிக்கையில், “அயலான் 2 படத்தின் விஎஃப்எக்ஸ் மற்றும் சிஜி பணிகளுக்கு மட்டும் 50 கோடி ரூபாய் பட்ஜெட் ஒதுக்கப்பட்டுள்ளது. இந்த பணிகளில் 200-க்கும் மேற்பட்ட தொழில்நுட்ப வல்லுநர்கள் பணியாற்றுகின்றனர். படத்தில் அமைக்கப்படும் விஎஃப்எக்ஸ் காட்சிகள் மிகவும் பிரமாண்டமாக இருக்கும்” என்று குறிப்பிடப்பட்டுள்ளது.
இந்த அறிவிப்பு ரசிகர்களை மகிழ்ச்சியில் ஆழ்த்தியுள்ளது. அயலான் 1 படத்தில் அமைக்கப்பட்ட விஎஃப்எக்ஸ் காட்சிகள் ரசிகர்களை ரசிக்க வைத்திருந்த நிலையில், அயலான் 2 படத்தில் அமைக்கப்படும் விஎஃப்எக்ஸ் காட்சிகள் எப்படி இருக்கும் என்பதை ஆவலுடன் எதிர்பார்த்து காத்திருக்கின்றனர்.
அயலான் 2 படம் 2025 பொங்கல் பண்டிகைக்கு வெளியாகும் என எதிர்பார்க்கப்படுகிறது.