இசையமைப்பாளரும் நடிகருமான விஜய் ஆண்டனி, தொடர்ந்து நல்ல கதைகளைத் தேர்ந்தெடுத்து நடித்து வருகிறார். இறுதியாக, இவர் நடிப்பில் வெளியான பிச்சைக்காரன் 2, கொலை, ரத்தம் ஆகிய படங்கள் வசூல் ரீதியான வெற்றிகளைப் பெற்றன.
இதனைத் தொடர்ந்து, விஜய் ஆண்டனி இயக்குநர் விநாயக் வைத்தியநாதன் இயக்கத்தில் ‘ரோமியோ’ என்கிற காதல் படமொன்றில் நடித்து வருகிறார். நாயகியாக மிருணாளினி ரவி நடிக்கிறார். விஜய் ஆண்டனியே தயாரிக்கும் இப்படம் கோடை வெளியீடாக திரைக்கு வரும் என்றும் அறிவிக்கப்பட்டுள்ளது.
இந்நிலையில், இப்படத்தின் முதல் போஸ்டரைப் படக்குழு வெளியிட்டுள்ளது. முதலிரவின்போது நாயகனுக்கு பாலுக்குப் பதிலாக மதுவை ஊற்றிக்கொடுக்கும் நாயகி என சுவாரஸ்யமான இந்தப் போஸ்டர் கவனம் பெற்று வருகிறது.
போஸ்டரில், விஜய் ஆண்டனி ஒரு நகர்ப்புற இளைஞனாக, மிருணாளினி ரவி ஒரு கிராமத்து பெண்ணாக காட்சியளிக்கின்றனர். முதலிரவின்போது, விஜய் ஆண்டனி படுக்கையில் படுத்திருக்க, மிருணாளினி ரவி அவருக்கு ஒரு டம்ளர் மதுபானத்தை ஊற்றிக் கொடுக்கிறார். இந்தக் காட்சி, படத்தின் கதையைப் பற்றிய ஒரு சுவாரஸ்யமான யூகத்தை ரசிகர்களுக்கு ஏற்படுத்துகிறது.
‘ரோமியோ’ படத்தின் இசையமைப்பாளர் பரத் தனசேகர். ஒளிப்பதிவாளர் ஓம்பிரகாஷ். படத்தின் மற்ற நடிகர்கள் மற்றும் தொழில்நுட்ப கலைஞர்கள் விரைவில் அறிவிக்கப்பட உள்ளனர்.