இந்தியாவில் சுற்றுப்பயணம் மேற்கொண்டு வரும் இங்கிலாந்து அணி, 5 போட்டிகள் கொண்ட டெஸ்ட் தொடரில் மோதுகிறது. முதல் டெஸ்ட் போட்டி ஐதராபாத்தில் ஜனவரி 25ம் தேதி தொடங்குகிறது. இந்த நிலையில், அபுதாபியில் நடைபெற்று வந்த பயிற்சி முகாமில் பங்கேற்றிருந்த இங்கிலாந்து வீரர் ஹாரி புரூக், சொந்த காரணங்களுக்காக இந்திய சுற்றுப்பயணத்தில் இருந்து விலகியுள்ளார்.
கடந்த 2022ம் ஆண்டு டெஸ்ட் அணியில் அறிமுகமான புரூக், இதுவரை 12 டெஸ்டில் விளையாடி 1181 ரன்கள் (அதிகம் 186, சராசரி 62.15, சதம் 4, அரை சதம் 7) விளாசியுள்ளார். சூப்பர் பார்மில் இருக்கும் புரூக் திடீரென விலகியுள்ளது இங்கிலாந்து அணிக்கு பெரும் பின்னடைவாக அமைந்துள்ளது. அவருக்கு பதிலாக நடுவரிசை பேட்ஸ்மேன் டேனியல் வில்லியம் லாரன்ஸ் அணியில் சேர்க்கப்பட்டுள்ளார்.
புரூக்கின் விலகல் குறித்து இங்கிலாந்து அணி மேலாளர் க்ரெய்க் பெர்ட்ஸ்வேல் கூறுகையில், “புரூக் தனது சொந்த காரணங்களுக்காக இந்திய சுற்றுப்பயணத்தில் இருந்து விலக முடிவு செய்துள்ளார். அவருக்கு எங்கள் ஆதரவு உண்டு. அவருக்கு பதிலாக டேனியல் வில்லியம் லாரன்ஸ் அணியில் சேர்க்கப்பட்டுள்ளார். அவர் ஒரு திறமையான வீரர். இந்திய அணியுடன் நடக்கும் போட்டிகளில் சிறப்பாக செயல்படுவார் என்று நம்புகிறேன்” என்றார்.
நேற்று ஐதராபாத் வந்த இங்கிலாந்து அணி வீரர்கள், ராஜிவ் காந்தி சர்வதேச ஸ்டேடியத்தில் இன்று முதல் பயிற்சி மேற்கொள்ள உள்ளனர்.