பேஸ்புக்கின் தாய் நிறுவனமான மெட்டாவின் நிறுவனரான மார்க் சக்கர்பெர்க், பல்வேறு துறைகளில் தனது திறமையை வெளிப்படுத்தி வருகிறார். சமீபத்தில், ஹவாயில் உள்ள கவாய் தீவின் பாதியை தனக்கு சொந்தமாக வாங்கிய அவர், அங்கு நூற்றுக்கணக்கான ஏக்கர் பரப்பளவில் பண்ணை ஒன்றை அமைத்து வருகிறார். இந்த பண்ணையில் மாடு வளர்ப்பு தொழிலைத் தொடங்கியுள்ளார்.
மாடுகளுக்கு பொதுவாக சோளம், புற்கள் மற்றும் தீவணம் போன்ற உணவுகள் வழங்கப்படுகின்றன. ஆனால், மார்க் சக்கர்பெர்க் தனது பண்ணையில் உள்ள மாடுகளுக்கு உலர் கொட்டைகள், உள்ளூரில் தயாரிக்கப்படும் பீர் ஆகியவற்றையும் கொடுத்து வளர்த்து வருகிறார். இதன் மூலம், உயர்தரமான மாட்டிறைச்சியை உருவாக்க முடியும் என்று அவர் நம்புகிறார்.
“உயர்தரமான மாட்டிறைச்சியை உருவாக்குவதே எனது இலக்கு. அதற்காக எனது பண்ணையில் வளர்க்கும் மாடுகளுக்கு மக்காடமியா கொட்டைகள் மற்றும் பீர் போன்றவை உணவாக கொடுக்கிறோம். இதன்மூலம், தரமான இறைச்சியை தயாரிக்கலாம். இந்த பீர் மற்றும் மக்காடமியா கொட்டைகளும் இங்குதான் தயாரிக்கப்படுகின்றன. இதற்காக பல ஏக்கர் பரப்பளவில் மக்காடமியா மரங்கள் வளர்க்கப்படுகின்றன” என்று மார்க் சக்கர்பெர்க் தனது இன்ஸ்டாகிராம் பதிவில் தெரிவித்துள்ளார்.
இந்த புதிய தொழில் மார்க் சக்கர்பெர்க்கிற்கு வெற்றிபெறுமா என்பது எதிர்காலத்தில் தெரியவரும். ஆனால், அவரது இந்த முயற்சிக்கு பலரும் ஆதரவு தெரிவித்து வருகின்றனர்.