மக்கள் நீதி மய்யம் கட்சித் தலைவர் கமல் ஹாசன், மக்களவைத் தேர்தலில் கூட்டணி குறித்து விரைவில் அறிவிக்கப்படும் என்று தெரிவித்துள்ளார்.
மக்கள் நீதி மய்யம் கட்சியில் மாவட்ட செயலாளர்களை நியமிக்கும் பணிகள் நடைபெற்று வருகின்றன. இதைத் தொடர்ந்து, மக்களவைத் தேர்தல் நெருங்கி வருவதால், தேர்தல் பணிகளில் கட்சியினர் தீவிர கவனம் செலுத்தி வருகின்றனர்.
இந்நிலையில், புதுச்சேரி மாநில செயற்குழு கூட்டம் சென்னை ஆழ்வார்பேட்டையில் உள்ள கட்சித் தலைமையகத்தில் நேற்று (ஜனவரி 23) நடைபெற்றது. கூட்டத்துக்கு கமல் ஹாசன் தலைமை தாங்கினார்.
கூட்டத்தில், மக்களவைத் தேர்தல், அடுத்து வரும் சட்டப்பேரவை தேர்தல்களை எப்படி அணுக வேண்டும் என்பது குறித்தும், மக்களவைத் தேர்தல் கூட்டணி, கட்சி வளர்ச்சி குறித்தும் கமல் ஹாசன் ஆலோசனை வழங்கினார்.
அப்போது, தேர்தல் கூட்டணி குறித்து, பல்வேறு கட்சிகள் பேசி வருவதாகவும், கூட்டணி குறித்து இன்னும் முடிவெடுக்கவில்லை என்றும் நிர்வாகிகளிடம் கமல் ஹாசன் தெரிவித்துள்ளார். மேலும், கூட்டணி, கட்சி போட்டியிடும் தொகுதிகள் குறித்து விரைவில் அறிவிப்பதாகவும் கமல்ஹாசன் தெரிவித்துள்ளார்.
தமிழக மநீம செயற்குழு கூட்டம் இன்று (ஜனவரி 24) ஆழ்வார்பேட்டை கட்சி அலுவலகத்தில் நடைபெறுகிறது. இந்த கூட்டத்தில் கூட்டணி குறித்து மேலும் ஆலோசனை நடத்தப்படும் என்று எதிர்பார்க்கப்படுகிறது.